ವಾಷಿಂಗ್ಟನ್: ಮಾನಸಿಕ ಒತ್ತಡ ಹಾಗೂ ಆತಂಕದ ಸಂದರ್ಭಗಳಲ್ಲಿ ಬೆಕ್ಕುಗಳು ಮಾನವರಿಗೆ ಭಾವನಾತ್ಮಕ ನೆಮ್ಮದಿ ನೀಡುವಲ್ಲಿ ಮಹತ್ವದ ಪಾತ್ರವಹಿಸುತ್ತವೆ ಎಂಬ ಅಚ್ಚರಿಯ ಸಂಗತಿ ಹೊಸ ಅಧ್ಯಯನದಲ್ಲಿ ಬೆಳಕಿಗೆ ಬಂದಿದೆ. ವಿಶೇಷವಾಗಿ ಹೆಚ್ಚು ಭಾವನಾತ್ಮಕ ಹಾಗೂ ಸಂವೇದನಾಶೀಲ ವ್ಯಕ್ತಿಗಳು ಒತ್ತಡದ ಸಮಯದಲ್ಲಿ ಬೆಕ್ಕುಗಳ ಸಂಗವನ್ನು ಹೆಚ್ಚು ಇಷ್ಟಪಡುತ್ತಾರೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
ವಾಷಿಂಗ್ಟನ್ ಸ್ಟೇಟ್ ಯುನಿವರ್ಸಿಟಿ ಹಾಗೂ ಬೆಲ್ಜಿಯಂನ ಕೆ.ಯು. ಲ್ಯೂವೆನ್ ವಿಶ್ವವಿದ್ಯಾಲಯದ ಸಂಶೋಧಕರು ನಡೆಸಿದ ಈ ಅಧ್ಯಯನದಲ್ಲಿ 20 ಶಿಕ್ಷಣ ಸಂಸ್ಥೆಗಳ 1,400ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿಯನ್ನು ಒಳಗೊಂಡಂತೆ ಸಮೀಕ್ಷೆ ನಡೆಸಲಾಗಿದೆ. ಅಧ್ಯಯನದ ಪ್ರಕಾರ, ಭಾವನಾತ್ಮಕ ಸ್ಪಂದನೆ ಹೆಚ್ಚು ಇರುವವರು ಬೆಕ್ಕುಗಳೊಂದಿಗೆ ಸಮಯ ಕಳೆಯುವುದರಿಂದ ಹೆಚ್ಚು ಶಾಂತಿ ಮತ್ತು ನೆಮ್ಮದಿ ಅನುಭವಿಸುತ್ತಾರೆ ಎಂದು ತಿಳಿದುಬಂದಿದೆ.
ಸಂಶೋಧಕರ ಪ್ರಕಾರ, ಬೆಕ್ಕಿನ ಮೃದುವಾದ ಸ್ಪರ್ಶ, ಅದರ ಶಾಂತ ಸ್ವಭಾವ ಹಾಗೂ ಪುರ್ರಿಂಗ್ (purring) ಧ್ವನಿ ಮಾನಸಿಕ ಒತ್ತಡವನ್ನು ಕಡಿಮೆ ಮಾಡಲು ಸಹಕಾರಿಯಾಗಿದೆ. ಕೇವಲ 10 ನಿಮಿಷಗಳ ಕಾಲ ಬೆಕ್ಕಿನೊಂದಿಗೆ ಕಾಲ ಕಳೆಯುವುದರಿಂದ ದೇಹದಲ್ಲಿನ ಒತ್ತಡ ಹಾರ್ಮೋನ್ ಎಂದು ಕರೆಯಲ್ಪಡುವ ಕಾರ್ಟಿಸೋಲ್ ಮಟ್ಟ ಕಡಿಮೆಯಾಗುತ್ತದೆ ಎಂದು ಅಧ್ಯಯನ ತಿಳಿಸಿದೆ.
ಇದೇ ವೇಳೆ, “ಕ್ಯಾಟ್ ಲವರ್ಸ್” ಅಥವಾ ಬೆಕ್ಕುಗಳನ್ನು ಹೆಚ್ಚು ಇಷ್ಟಪಡುವವರಲ್ಲಿ ಸಹಾನುಭೂತಿ, ಭಾವನಾತ್ಮಕ ಸ್ಪಂದನೆ ಹಾಗೂ ಶಾಂತ ವಾತಾವರಣದತ್ತ ಒಲವು ಹೆಚ್ಚಿರುವುದು ಕಂಡುಬಂದಿದೆ. ಈ ಹಿನ್ನೆಲೆಯಲ್ಲಿ ಮಾನಸಿಕ ಆರೋಗ್ಯ ಹಾಗೂ ಒತ್ತಡ ನಿವಾರಣಾ ಚಿಕಿತ್ಸಾ ಕಾರ್ಯಕ್ರಮಗಳಲ್ಲಿ ನಾಯಿಗಳ ಜೊತೆಗೆ ಬೆಕ್ಕುಗಳನ್ನೂ ಸೇರಿಸಬೇಕು ಎಂದು ಸಂಶೋಧಕರು ಸಲಹೆ ನೀಡಿದ್ದಾರೆ.
ಮಾನಸಿಕ ಒತ್ತಡ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಇಂದಿನ ಜೀವನಶೈಲಿಯಲ್ಲಿ, ಸಾಕುಪ್ರಾಣಿಗಳು ವಿಶೇಷವಾಗಿ ಬೆಕ್ಕುಗಳು ಮಾನಸಿಕ ನೆಮ್ಮದಿ ನೀಡುವ “ನೈಸರ್ಗಿಕ ಥೆರಪಿ”ಯಾಗಿ ಪರಿಣಮಿಸುತ್ತಿವೆ ಎಂದು ಅಧ್ಯಯನ ಅಭಿಪ್ರಾಯಪಟ್ಟಿದೆ.
