web analytics
My page - topic 1, topic 2, topic 3
ಸಿದ್ಧಗಂಗಾ ಶ್ರೀಗಳ 2ನೇ ಪುಣ್ಯಸ್ಮರಣೆ; ನಡೆದಾಡುವ ದೇವರ ಬಗ್ಗೆ ನಿಮಗೆಷ್ಟು ಗೊತ್ತು?; ಸಮಗ್ರ ಲೇಖನ ಓದಿ

ಸಿದ್ಧಗಂಗಾ ಶ್ರೀಗಳ 2ನೇ ಪುಣ್ಯಸ್ಮರಣೆ; ನಡೆದಾಡುವ ದೇವರ ಬಗ್ಗೆ ನಿಮಗೆಷ್ಟು ಗೊತ್ತು?; ಸಮಗ್ರ ಲೇಖನ ಓದಿ

 1,327 

Tumkurnews.in
ತುಮಕೂರು; ಸಿದ್ಧಗಂಗಾ ಮಠದ ಹಿರಿಯ ಶ್ರೀ ಡಾ.ಶಿವಕುಮಾರ ಸ್ವಾಮೀಜಿ ಅವರು ಲಿಂಗೈಕ್ಯರಾಗಿ ಇದೇ ಜನವರಿ 21, 2021ಕ್ಕೆ ಎರಡು ವರ್ಷ ತುಂಬುತ್ತಿದ್ದು, ನಾಡಿನಾದ್ಯಂತ ಭಕ್ತರು ಶ್ರೀಗಳ ಪುಣ್ಯ ಸ್ಮರಣೆಯಲ್ಲಿ ನಿರತರಾಗಿದ್ದಾರೆ.
ಈ ಸಂದರ್ಭದಲ್ಲಿ ಸಿದ್ಧಗಂಗಾ ಮಠ, ಡಾ.ಶಿವಕುಮಾರ ಸ್ವಾಮಿಗಳ ಕುರಿತಾದ ಸಮಗ್ರ ಬರಹ ಇಲ್ಲಿದೆ. ಸಿದ್ಧಗಂಗಾ ಮಠದ ಕುರಿತಾಗಿ ನಾಡಿನ ವಿವಿಧ ಲೇಖಕರು ಬರೆದಿರುವ ವಿವಿಧ ಗ್ರಂಥಗಳನ್ನು ಆಧರಿಸಿ ಈ ಲೇಖನವನ್ನು ಸಿದ್ದಪಡಿಸಲಾಗಿದೆ.
*******
ರಾಮನಗರ ಜಿಲ್ಲೆ ಮಾಗಡಿ ತಾಲೂಕು ವೀರಾಪುರದ ಹೊನ್ನಪ್ಪ(ಹೊನ್ನೇಗೌಡರು) ಮತ್ತು ಗಂಗಮ್ಮ ದಂಪತಿಯರಿಗೆ 13 ಮಕ್ಕಳಲ್ಲಿ ಶಿವಣ್ಣ(ಡಾ.ಶ್ರೀ ಶಿವಕುಮಾರಸ್ವಾಮೀಜಿ) ಒಬ್ಬರಾಗಿ 1908ರ ಏಪ್ರಿಲ್ 1ರಂದು ಜನಿಸಿದರು. ಇವರ ಆಗಮನದಿಂದ ಮನೆಯಲ್ಲಿ ಬೆಳೆ, ದನ, ಕರು, ಮೇವು ಎಲ್ಲದರಲ್ಲೂ ಸಮೃದ್ಧಿ ಉಂಟಾಯಿತು. ಎಂಟು ಗಂಡು ಮತ್ತು ಐದು ಹೆಣ್ಣು ಮಕ್ಕಳಲ್ಲಿ ಉತ್ಸಾಹ ಚಿಲುಮೆಯಂತೆ ಕಾಣುತ್ತಿದ್ದ ಇವರ ಮೇಲೆ ತಂದೆ-ತಾಯಿಗಳಿಗೆ ವಾತ್ಸಲ್ಯ ಅಧಿಕವಾಗಿತ್ತು. ತಂದೆ-ತಾಯಿ, ಅಣ್ಣಂದಿರ, ಅಕ್ಕಂದಿರ, ಮಮತೆಯ ಸಾಗರದಲ್ಲಿ ಬೆಳೆಯಲಾರಂಭಿಸಿದ ಶ್ರೀ ಶಿವಕುಮಾರ ಸ್ವಾಮಿಗಳು ಸಮಗ್ರ ವೀರಾಪುರಕ್ಕೆ ಪ್ರೀತಿಯ ಬಾಲಕರಾಗಿದ್ದರು.
ಬಾಲ್ಯದಲ್ಲಿ ತುಂಟ: ಬಹಳ ತುಂಟಬಾಲಕರಾಗಿದ್ದರಿಂದ ಶಾಲೆಗೆ ಸೇರಿಸುವುದೇ ತಂದೆ ತಾಯಿಗಳಿಗೆ ಒಂದು ಚಿಂತೆಯಾಯಿತು. ಊರಿನಲ್ಲಿ ಸರಿಯಾದ ಶಾಲೆ ಇರಲಿಲ್ಲ. ಅನಿವಾರ್ಯವಾಗಿ ನಾಲ್ಕನೇ ವರ್ಷಕ್ಕೆ ಸಮೀಪದ ಕೂಲಿ ಮಠಕ್ಕೆ ಸೇರಿಸಲಾಯಿತು. ಎಂಟು ವರ್ಷಗಳವರೆಗೆ ವೀರಾಪುರ ಮತ್ತು ಪಕ್ಕದ ಹಳ್ಳಿಯಾದ ಪಾಲನಹಳ್ಳಿಗಳಲ್ಲಿ ಪ್ರಾಥಮಿಕ ಶಿಕ್ಷಣ ಮುಗಿಸಿದರು. ದೈಹಿಕವಾಗಿ ದಷ್ಟಪುಷ್ಟವಾಗಿದ್ದರಿಂದ ವಯಸ್ಸಿಗಿಂತ ಎರಡು ವರ್ಷ ದೊಡ್ಡವರಾಗಿ ಕಾಣುತ್ತಿದ್ದರು. ಪಾದರಸದಂತೆ ಕ್ರಿಯಾಶೀಲರಾಗಿದ್ದ, ಅವರ ತುಂಟತನಗಳು ಹಾಸ್ಯಮಯವಾಗಿರುತ್ತಿದ್ದವು. ತಾನೂ ನಕ್ಕು ಎಲ್ಲರನ್ನೂ ನಗಿಸಿ ಆನಂದದ ವಾತಾವರಣ ಸೃಸ್ಟಿಸುತ್ತಿದ್ದರು. ಬಾಲ್ಯದಲ್ಲಿ ಕುದರೆಯನ್ನೇರುವುದು, ಹಣ್ಣಿನ ಮರಗಳನ್ನು ಹತ್ತುವುದು, ಸ್ನೇಹಿತರೊಂದಿಗೆ ಅಡವಿ ಸುತ್ತುವುದು, ಕೆರೆಯಲ್ಲಿ ಈಜುವುದು, ಮರಕೋತಿ ಆಟವಾಡುವುದು, ಹೀಗೆ ನಾನಾ ಚಟುವಟಿಕೆಗಳಲ್ಲಿ ಕ್ರಿಯಾಶೀಲರಾಗಿರುತ್ತಿದ್ದರು.
ತಂದೆ ತಮಗಾಗಿ ಸಾಕಿದ್ದ ಕುದುರೆಯನ್ನೇರಿ ಆಗಾಗ ಸವಾರಿ ಮಾಡಿ ಎಲ್ಲರೂ ಬೆರಗುಗೊಳ್ಳವಂತೆ ಮಾಡುತ್ತಿದ್ದರು. ವೆಂಕಟರಮಣಯ್ಯ ಎಂಬುವವರು ಬಾಲ್ಯದ ಆಪ್ತ ಮಿತ್ರರಾಗಿದ್ದರು. ಗೊಲ್ಲರ ಬಾಲಯ್ಯ, ಆದಿಕರ್ನಾಟಕದ ರುದ್ರಯ್ಯ ಇವರುಗಳು ಇನ್ನಿತರ ಸ್ನೇಹಿತರಾಗಿದ್ದರು.
ಅಕ್ಕನ ಅಕ್ಕರೆಯ ತಮ್ಮನಾಗಿ: ಅತಿಥಿ ಸತ್ಕಾರ ಇವರ ಹುಟ್ಟುಗುಣ. `ಹೊನ್ನೇ ಗೌಡರ ಮನೆಗೆ ಈ ಮಗ ಅನ್ನವನ್ನು ಕಟ್ಟಿಕೊಂಡೇ ಹುಟ್ಟಿಬಂದಿದ್ದಾನೆ’ ಎಂದು ಊರವರು ಮಾತನಾಡಿಕೊಳ್ಳುತ್ತಿದ್ದರು. ಅದು ನಿಜವೂ ಆಗಿತ್ತು. ಔದಾರ್ಯ, ಜನಪ್ರೀತಿ, ಔತ್ಸುಕ್ಯ, ಕಾರ್ಯಶ್ರದ್ಧೆಗಳು ಹುಟ್ಟುಗುಣಗಳಾಗಿ ಅವರೊಂದಿಗೆ ಬೆಳೆದು ಬಾಲ್ಯ ಜೀವನದ ಮರೆಯಲ್ಲಿ ಅಡಗಿದ ಮಹಾ ಮಾನವತೆಯ ಬೀಜಗಳಂತೆ ಅವ್ಯಕ್ತವಾಗಿದ್ದವು.
ಪ್ರಾಥಮಿಕ ವಿದ್ಯಾಭ್ಯಾಸ ಮುಗಿದ ಮೇಲೆ ಶಿವಣ್ಣನವರನ್ನು ಯಾವ ಶಾಲೆಗೆ ಸೇರಿಸಬೇಕೆಂಬುದೇ ಹೊನ್ನೇಗೌಡರಿಗೆ ಒಂದು ಚಿಂತೆಯಾಯಿತು. ಸ್ವಲ್ಪದಿನ ಗುಂಡಿಗೆರೆಯ ಕಿರಿಯ ಮಗಳು ಗೌರಕ್ಕನ ಮನೆಗೆ ಕಳುಹಿಸಿದರು. ಅಲ್ಲಿಯೂ ಇವರ ತುಂಟತನ ತಡೆಯಲಾಗಲಿಲ್ಲ. ಆಗ ನಾಗವಲ್ಲಿ ಗಂಗೇಗೌಡ ಎಂಬುವವರಿಗೆ ಕೊಟ್ಟಿದ್ದ ದೊಡ್ಡ ಮಗಳು ಪುಟ್ಟಹೊನ್ನಮ್ಮನವರ ಮನೆಯಲ್ಲಿ ಬಿಡಲಾಯಿತು. ಜತೆಗಾರನಾಗಿ ಇರಲಿ ಎಂಬ ಕಾರಣಕ್ಕೆ ಲಿಂಗಪ್ಪ ಎಂಬ ಇನ್ನೊಬ್ಬ ಮಗನನ್ನು ಸಹ ಇಲ್ಲಿಯೇ ಬಿಡಲಾಯಿತು. ಯಾರಿಗೂ ಈತ ಸಮಸ್ಯೆಯ ಮಗನಾಗಿರಲಿಲ್ಲ. ಶಿವಣ್ಣನವರ ಬಗ್ಗೆ ಎಲ್ಲರಿಗೂ ಚಿಂತೆಯಾಗಿತ್ತು. ಪುಟ್ಟಹೊನ್ನಮ್ಮ ತಮ್ಮ ಶಿವಣ್ಣನವರನ್ನು ಮಗನಂತೆ ಸಲಹುವುದಾಗಿ ಅಣ್ಣ ಹೊನ್ನೇಗೌಡರಿಗೆ ಭರವಸೆ ನೀಡಿದಳು.
ತಮ್ಮೂರಿನ ಎ.ವಿ.ಸ್ಕೂಲಿಗೆ ತಮ್ಮ ಶಿವಣ್ಣನವರನ್ನು ಸೇರಿಸಿದಳು. ಸಹೋದರನ ತುಂಟತನವನ್ನು ಚೆನ್ನಾಗಿ ಅರಿತಿದ್ದ ಅಕ್ಕ, ಶಿವಣ್ಣನವರನ್ನು ನೋಡಿಕೊಳ್ಳಲು ಅವರ ತಾಯಿ ಅನುಸರಿಸುತ್ತಿದ್ದ ಮಾರ್ಗವನ್ನೇ ಅನುಸರಿಸಿದಳು. ಅಕ್ಕನ ಮನೆ ಶಿವಣ್ಣನವರಿಗೆ ಬೇರೆ ಮನೆ ಎಂದೆನಿಸುತ್ತಿರಲಿಲ್ಲ. ಈ ಹೊತ್ತಿಗಾಗಲೇ ಶಿವಣ್ಣನವರ ಅನೇಕ ತಂಟೆ-ತಕರಾರುಗಳು ಕಡಿಮೆಯಾಗಿದ್ದವು. ಶಿವಣ್ಣನವರಿಗೆ ಊಟೋಪಚಾರಗಳಲ್ಲಿ ಯಾವುದೇ ಕೊರತೆಯಾಗಲಿಲ್ಲ. ಹಾಲು, ಮೊಸರು, ತುಪ್ಪ ಯಥೇಚ್ಛವಾಗಿ ಹಾಕುತ್ತಿದ್ದರು. ಶಿವಣ್ಣನವರಿಗೆ ಅನ್ನದ ಮೇಲೆ ತುಪ್ಪ ಹಾಕಿದ ಮೇಲೆ ಅದನ್ನು ಅನ್ನದಲ್ಲಿ ಕಲೆಸಿ, ಮುಷ್ಟಿಯಲ್ಲಿ ಆ ಅನ್ನವನ್ನು ಹಿಚುಕಿದರೆ ಬೆರಳು ಸಂದಿಯಿಂದ ತುಪ್ಪ ಹೊರಬರಬೇಕಿತ್ತಂತೆ. ಇಲ್ಲವಾದರೆ `ಅಕ್ಕಾ, ನೋಡಿಲ್ಲಿ ನೀನು ಹಾಕಿದ ತುಪ್ಪ ಅನ್ನಕ್ಕೇ ಹತ್ತಲಿಲ್ಲ. ಇನ್ನಷ್ಟು ಹಾಕಿದರೆ ನಾನು ಉಣ್ಣುವುದು’, ಎಂದು ಹೇಳುತ್ತಿದ್ದರಂತೆ. ನಾಗವಲ್ಲಿಯಲ್ಲಿ ಶಿವಣ್ಣನವರ ಉತ್ಸಾಹಕ್ಕೆ ಭಂಗ ಬರಲಿಲ್ಲ. ಇಲ್ಲಿ ಸಹ ಅನೇಕ ಸ್ನೇಹಿತರನ್ನು ಹೊಂದಿಸಿಕೊಂಡು ತನ್ನ ಮಿಂಚಿನ ಚಟುವಟಿಕೆ ಆರಂಭಿಸಿದರು. ಬಳ್ಳಗೆರೆಯಿಂದ ಬರುತ್ತಿದ್ದ ಬೋರೆಗೌಡ ಇವರ ಆಪ್ತ ಮಿತ್ರರಲ್ಲಿ ಒಬ್ಬರಾಗಿದ್ದರು. ಶಿವಣ್ಣನವರ ಶ್ರದ್ಧೆ ಓದುವತ್ತ ತಿರುಗಿತ್ತು. ಶಿವಣ್ಣನವರು ಎಲ್ಲದರಲ್ಲೂ ಶಿಸ್ತುಬದ್ಧರಾಗಿದ್ದರು. ಇವರ ಠೀವಿಗೆ ಇವರನ್ನು ಜನರು ನಾನಾ ರೀತಿಯಲ್ಲಿ ಹೊಗಳುತ್ತಿದ್ದರು.
ಶಿಕ್ಷಣದಲ್ಲಿ ಚುರುಕು : ಓದಿನಲ್ಲಿ, ಆಟ ಪಾಠಗಳಲ್ಲಿ, ಪಠ್ಯೇತರ ಚಟುವಟಿಕೆಗಳಲ್ಲಿ ಯಾವಾಗಲೂ ಇವರದೇ ಮೇಲುಗೈ ಆಗಿರುತ್ತಿತ್ತು. ಇವರ ಪ್ರತಿಭೆಗೆ ಉಪಾಧ್ಯಾಯ ವರ್ಗ ದಂಗುಬಡಿದಿತ್ತು. ಎರಡು ವರ್ಷಗಳ ಪಾಠ ಪ್ರವಚನಗಳನ್ನು ಒಂದೇ ವರ್ಷದಲ್ಲಿ ಓದಿ 1919 ಕನ್ನಡ ಲೋಯರ್ ಸೆಕೆಂಡರಿ ಪರೀಕ್ಷೆಯಲ್ಲೂ, 1921 ರಲ್ಲಿ ಇಂಗ್ಲಿಷ್ ಲೋಯರ್ ಸೆಕೆಂಡರಿ ಪರೀಕ್ಷೆಯಲ್ಲಿ ತೇರ್ಗಡೆ ಹೊಂದಿದರು. ಅಣ್ಣ ಲಿಂಗಪ್ಪ, ಇಂಗ್ಲಿಷ್ ಲೋಯರ್ ಸೆಕೆಂಡರಿ ಪರೀಕ್ಷೆಯಲ್ಲಿ ತೇರ್ಗಡೆಯಾಗಲು ಒಂದು ವರ್ಷ ತಡವಾಯಿತು. ಇದರಿಂದ ಶಿವಣ್ಣನವರ ಒಂದು ವರ್ಷದ ವಿದ್ಯಾಭ್ಯಾಸ ನಿಂತಿತು. ಏಕೆಂದರೆ ಶಿವಣ್ಣನವರನ್ನು ಮತ್ತು ಅಣ್ಣ ಲಿಂಗಪ್ಪನವರನ್ನು ಒಟ್ಟಾಗಿ ತುಮಕೂರಿನಲ್ಲಿ ಓದಲು ಬಿಡಬೇಕಿತ್ತು. ನಾಗವಲ್ಲಿಯಲ್ಲಿ ಶಿವಣ್ಣನವರ ವಿದ್ಯಾಭ್ಯಾಸದಲ್ಲಿ ಮಹತ್ತರ ಸಾಧನೆ ಮಾಡುವ ಮೂಲಕ ಗ್ರಾಮಾಂತರ ಪ್ರದೇಶದ ಮೇಧಾವಿ ವಿದ್ಯಾರ್ಥಿಯಾಗಿ ಎಲ್ಲರ ಗಮನ ಸೆಳೆದರು.
ನಸುಕಿನಲ್ಲಿ ಎದ್ದು ಸ್ನಾನ ಮಾಡಿ, ಧ್ಯಾನ ಪೂಜೆಯತ್ತ ಇವರ ಒಲವು ಹರಿಯುತ್ತಿತ್ತು. ನಸುಕಿನಲ್ಲಿ ಬೇಗ ಎಚ್ಚರವಾಗಲಿಕ್ಕಿಲ್ಲ ಎಂದು ಶಂಕಿಸಿ ಎಷ್ಟೋ ದಿನ ತಾನು ಬಿಟ್ಟಿದ್ದ ಜುಟ್ಟಿಗೆ ಚಿಕ್ಕ ಹಗ್ಗ ಕಟ್ಟಿಕೊಂಡು ಮಲಗುತ್ತಿದ್ದರು. ಇನ್ನು ಓದುತ್ತ ಕುಳಿತರೆ ತಲ್ಲೀನರಾಗಿಬಿಡುತ್ತಿದ್ದರು. ಮೈ ಮುಟ್ಟಿಯೇ ಎಚ್ಚರಿಸಬೇಕಿತ್ತು.
ಈ ವಯಸ್ಸಿನಲ್ಲೇ ಶಿಸ್ತು ಬದ್ಧ ಜೀವನ, ಗಂಭೀರ ನಡೆ ನುಡಿ, ಕರ್ತವ್ಯದಲ್ಲಿನ ತೀವ್ರ ಆಸಕ್ತಿ, ನಿರ್ವಹಣಾ ಸಾಮಥ್ರ್ಯ ದೊಡ್ಡವರ ಗಮನ ಸೆಳೆಯಲು ಕಾರಣವಾಯಿತು. ಎಲ್ಲ ವಿದ್ಯಾರ್ಥಿ ಪಾಲಕರ ಹೊಗಳಿಕೆಯ ವಿದ್ಯಾರ್ಥಿಯಾಗಿ ಕಂಗೊಳಿಸಿದರು.
ನಾಗವಲ್ಲಿಯಿಂದ ತುಮಕೂರಿಗೆ ಬಂದರು: ನಾಗವಲ್ಲಿಯಲ್ಲಿ ರೂರಲ್ ಎ.ವಿ.ಸ್ಕೂಲ್ (ಗ್ರಾಮಾಂತರ ಆಂಗ್ಲೋ ಎರ್ನಾಕ್ಯುಲರ್ ಸ್ಕೂಲ್) ನಲ್ಲಿ ಯಶಸ್ವಿಯಾಗಿ ವಿದ್ಯಾಭ್ಯಾಸ ಮುಗಿಸಿ ಶಿವಣ್ಣನವರು ಅಣ್ಣ ಲಿಂಗಪ್ಪನವರೊಂದಿಗೆ 1922 ರಲ್ಲಿ ತುಮಕೂರಿಗೆ ಬಂದರು. ಸರಕಾರಿ ಹೈಸ್ಕೂಲಿಗೆ ಮೊದಲ ತರಗತಿಗೆ ಸೇರಿದರು. ತುಮಕೂರಿನಲ್ಲಿ ಒಂದು ಬಾಡಿಗೆ ಕೊಠಡಿ ಹಿಡಿದು ಸ್ವತಃ ಅಡುಗೆ ಮಾಡಿಕೊಂಡು ಊಟಮಾಡುತ್ತ ಹೈಸ್ಕೂಲ್ ವಿದ್ಯಾಭ್ಯಾಸ ಮುಂದುವರಿಸಿದರು. ಹೈಸ್ಕೂಲಿನಲ್ಲಿ ಕೆಂಬಳಲಿನಿಂದ ಬಂದ ಕಾಳಪ್ಪನವರ (ಕನಕ ದೇಗುಲ ಮಠದ ಮಹಾಲಿಂಗ ಸ್ವಾಮಿಗಳು) ಪರಿಚಯವಾಯಿತು. ಸ್ನೇಹವಾಗಿ ತಿರುವು ಪಡೆಯಿತು.
ಸಿದ್ಧಗಂಗೆಯ ಕೀರ್ತಿಯನ್ನು, ಉದ್ದಾನ ಶಿವಯೋಗಿಗಳ ಮಹಿಮಾತಿಶಯವನ್ನೂ ಬಾಲ್ಯದಿಂದಲೇ ಕೇಳುತ್ತಾ ಬಂದಿದ್ದ ಶಿವಣ್ಣನವರು ಬಿಡುವು ಸಿಕ್ಕಾಗಲೆಲ್ಲ ಸಿದ್ಧಗಂಗಾ ಕ್ಷೇತ್ರಕ್ಕೆ ಕಾಳಪ್ಪನವರೊಡನೆ ಭೇಟಿ ನೀಡುತ್ತಿದ್ದರು. ಆಗಲೇ ಇವರು ಉದ್ದಾನ ಶಿವಯೋಗಿಗಳ ಅಪಾರ ಶಿವಯೋಗ ಸಂಪತ್ತಿಗೆ ಮಾರುಹೋದರು. ಶಿವಣ್ಣನವರು ಸಿದ್ಧಗಂಗೆಯ ಪ್ರಕೃತಿ ಸೌಂದರ್ಯಕ್ಕೆ ಮಾರುಹೋಗಿದ್ದರು. ಬೆಟ್ಟವನ್ನೇರಿ ಸಿದ್ಧಲಿಂಗೇಶ್ವರ ಮೂರ್ತಿಯೆದುರು ಜಲತೀರ್ಥವಿರುವ ಅಮ್ಮನವರ ಗವಿಯಲ್ಲಿ ಕುಳಿತು ಗಂಟೆಗಟ್ಟಲೆ ಮೈಮರೆಯುತ್ತಿದ್ದರು. ಬೆಟ್ಟವನ್ನೇರಿ ಬೂದು ಬಣ್ಣದಲ್ಲಿ ವಿರಾಜಿಸುವ ಶಿವಗಂಗಾ ಬೆಟ್ಟ ನೋಡಿ ಕುಣಿದಾಡುತ್ತಿದ್ದರು. ಸಿದ್ಧಗಂಗಾ ಬೆಟ್ಟದ ಮೂಲೆ ಮೂಲೆಗಳ ಪರಿಚಯ ಮಾಡಿಕೊಂಡರು. ದಿನಕಳೆದಂತೆ ಸಿದ್ಧಗಂಗೆಯ ಮೇಲಿನ ಮಮತೆ ಅಧಿಕವಾಗತೊಡಗಿತು. ಆದರೆ ಉದ್ದಾನ ಸ್ವಾಮಿಗಳನ್ನು ಕಂಡರೆ ಎಲ್ಲಿಲ್ಲದ ಭಯ, ಭಕ್ತಿ. ಕಂಪನಗೊಳ್ಳುತ್ತ ದೂರದಿಂದಲೇ ನಮಸ್ಕಾರ ಹಾಕಿ ಬರುತ್ತಿದ್ದರು.
ಶಿವಣ್ಣನವರ ತೇಜೋವಿಶೇಷ, ಗುರುಲಿಂಗ ಜಂಗಮ ಭಕ್ತಿ, ತಲ್ಲೀನತೆಗೆ ಆಕರ್ಷಿತರಾದ ಆ ಮಠದ ಉತ್ತರಾಧಿಕಾರಿಗಳೆಂದು ಗೊತ್ತಾಗಿದ್ದ ಮರುಳಾರಾಧ್ಯರು ಇವರಲ್ಲಿ ಯಾವುದೋ ವಿಶೇಷ ಶಕ್ತಿಯನ್ನು ಕಾಣತೊಡಗಿದರು. ಇವರಲ್ಲಿರುವ ಮಹತ್ತರ ತೇಜಸ್ಸಿಗೆ ಮಾರುಹೋಗಿದ್ದರು. ಈ ನಡುವೆ ಶಿವಣ್ಣ ಕಷ್ಟಪಟ್ಟು ಓದಿ 1929ರಲ್ಲಿ ಮೆಟ್ರಿಕ್ಯುಲೇಶನ್ ಪರೀಕ್ಷೆಯಲ್ಲಿ ತೇರ್ಗಡೆ ಹೊಂದಿದರು. ಈ ಹೊತ್ತಿಗೆ ಅಣ್ಣ ಲಿಂಗಪ್ಪನವರು ಶಿಕ್ಷಣ ಕುಂಠಿತಗೊಳಿಸಿ ಊರಿಗೆ ಹಿಂದಿರುಗಿದ್ದರು.
 
ಪ್ಲೇಗು ಜಾಢ್ಯದ ನಿಮಿತ್ತ 1924ರಲ್ಲಿ ಶಿವಣ್ಣನವರದ್ದೂ ಒಂದು ವರ್ಷ ವಿದ್ಯಾಭ್ಯಾಸ ಕುಂಠಿತಗೊಂಡಿತ್ತು.
ಪ್ಲೇಗಿನ ಭಯದಿಂದ ಸ್ವತಃ ಕೊಠಡಿಯಲ್ಲಿ ಅಡುಗೆ ಮಾಡಿಕೊಂಡು ಊಟ ಮಾಡುವುದು ಅನಾನುಕೂಲವಾಗಿತ್ತು. ಆದ್ದರಿಂದ ಉದ್ದಾನ ಶಿವಯೋಗಿಗಳನ್ನು ಕಂಡು ಮಠದಲ್ಲಿ ಊಟ, ವಸತಿ ಸೌಕರ್ಯಕ್ಕಾಗಿ ಪ್ರಾರ್ಥಿಸಿಕೊಳ್ಳಬೇಕು ಎಂದು ಸಿದ್ಧಗಂಗೆಗೆ ಬಂದರು. ಶಿವಯೋಗಿಗಳನ್ನು ಕಾಣುವುದು ಹೇಗೆ? ಎಂದು ಬಹಳ ಹೊತ್ತು ಯೋಚಿಸಿದರು. ಏಕೆದಂರೆ ಶಿವಣ್ಣನವರಿಗೆ ಯಾರನ್ನಾದರೂ ಕೇಳಬೇಕೆಂದರೆ ಆಗುತ್ತಿರಲಿಲ್ಲ. ಅತ್ಯಂತ ಸಂಕೋಚ ಸ್ವಭಾವದವರಾಗಿದ್ದರು.
ಆದರೂ ಧೈರ್ಯಮಾಡಿ ಉದ್ದಾನ ಶಿವಯೋಗಿಗಳನ್ನು ಕಂಡು ಆಶ್ರಯ ಪಡೆದು ಶಿಕ್ಷಣ ಮುಂದುವರಿಸುವ ಇಂಗಿತ ವ್ಯಕ್ತಪಡಿಸಿದರು. ಆದರೆ ಉದ್ದಾನ ಶಿವಯೋಗಿಗಳು `ಸಾಧ್ಯವಾಗುವುದಿಲ್ಲ’ ಎಂದು ಬಿಟ್ಟರು. ಶಿವಣ್ಣನವರ ಆಸೆಗೆ ತಣ್ಣೀರೆರೆಚಿದಂತಾಯಿತು. ಆದರೂ ಭಕ್ತಿ ಕಡಿಮೆಯಾಗಲಿಲ್ಲ. ಮರುಳಾರಾಧ್ಯರಾಗಲಿ, ಮಿತ್ರ ಕಾಳಪ್ಪನವರಾಗಲಿ ಮಠದಲ್ಲಿ ಇವರಿಗೆ ಸ್ಥಾನಕೊಡಿಸಲು ಅಸಮರ್ಥರಾದರು. ಶಿವಣ್ಣನವರು ನಿರುಪಾಯರಾದರು. ನಗರ ಶೆಟ್ಟಿಹಳ್ಳಿಯಲ್ಲಿ  ಒಂದು ಬಾಡಿಗೆ ಕೊಠಡಿ ಹಿಡಿದು ಅಡುಗೆ ಮಾಡಿಕೊಂಡು ಶಿಕ್ಷಣ ಮುಂದುವರಿಸಿದರು. ಕಷ್ಟಪಟ್ಟು ಓದುತ್ತಿರುವ ವಿಷಯ ಉದ್ದಾನ ಶಿವಯೋಗಿಗಳ ಗಮನಕ್ಕೆ ಹೇಗೋ ತಿಳಿಯಿತು. ಶಿವಣ್ಣರ ಪರಿಸ್ಥಿತಿಗೆ ಮರುಗಿದ ಶ್ರೀಗಳು, ನಾಲ್ಕು ತಿಂಗಳ ಅವಧಿಗೆ ಮಠದ ವಿದ್ಯಾರ್ಥಿ ನಿಲಯದಲ್ಲಿ ಆಶ್ರಯ ಪಡೆಯಲು ಅವಕಾಶ ನೀಡಿದರು. ಆಶ್ರಯ ಪಡೆದ ಶಿವಣ್ಣನವರು 1927ರ ಮಾರ್ಚ್, ಏಪ್ರಿಲ್‍ನಲ್ಲಿ ಮೆಟ್ರಿಕ್ಯುಲೇಶನ್ ನಂತರದ ಎಂಟ್ರನ್ಸ್ ಪರೀಕ್ಷೆಯಲ್ಲಿ ತೇರ್ಗಡೆ ಹೊಂದಿದರು.
ಈ ನಾಲ್ಕು ತಿಂಗಳ ಅವಧಿಯಲ್ಲಿ ಶ್ರೀ ಕ್ಷೇತ್ರದ ವಿದ್ಯಾರ್ಥಿಯಾಗಿದ್ದ ಶಿವಣ್ಣ ಮತ್ತು ಮಠದ ಉತ್ತರಾಧಿಕಾರಿ ಎಂದು ನೇಮಕಗೊಂಡಿದ್ದ ಮರುಳಾರಾಧ್ಯರ ನಡುವಿನ ಸ್ನೇಹ ಗಾಢವಾಯಿತು. ಅಂತೆಯೇ ಕಾಳಪ್ಪನವರ ಸ್ನೇಹ ಸಹ ಗಾಢವಾಯಿತು.
ಗಂಭೀರ ಸ್ವಭಾವದ, ಸತತಾಭ್ಯಾಸದ, ಕ್ರಿಯಾ ಪ್ರಾಬಲ್ಯ ಶಕ್ತಿಯ ಶುದ್ಧ ಶೀಲಾದಿ ಗುಣ ವಿಶೇಷದ ಇವರ ಪ್ರಭಾವ ಮುದ್ರೆ ಎಲ್ಲರನ್ನೂ ಆಕರ್ಷಿಸಿತು. ಉದ್ದಾನ ಶಿವಯೋಗಿಗಳಿಗೆ ದಿನೆ ದಿನೆ ಶಿವಣ್ಣನವರ ಪರಿಚಯವಾಗತೊಡಗಿತು. ಶಿವಣ್ಣನವರ ಹೆಸರು ಮಠದ ಪರಿಸರದಲ್ಲಿ ಪ್ರತಿಧ್ವನಿಸತೊಡಗಿತು. ವೀರಾಪುರದ ಶಿವಣ್ಣ ಉತ್ತಮ ವಿದ್ಯಾರ್ಥಿ, ತೇಜಶ್ಯಾಲಿ, ಸಂಸ್ಕøತಿ ಸಂಪನ್ನ, ಸಂಯಮಿ, ಸತ್ಯಶೀಲ, ಸದಾಚಾರಿ, ಲಿಂಗಪೂಜಾನಿಷ್ಠ, ಅತಿಸ್ನೇಹಿ, ಕರ್ತವ್ಯ ಕುಶಲ ಇತ್ಯಾದಿಯಾಗಿ ಜನರ ಪ್ರಶಂಸೆಗೆ ಪಾತ್ರರಾದರು.
ವಿದ್ಯಾಭ್ಯಾಸಕ್ಕೆ ಬೆಂಗಳೂರಿಗೆ ಪ್ರಯಾಣ: ಶಿವಣ್ಣನವರ ವಿದ್ಯಾಭ್ಯಾಸದ ಮೂರನೇ ಹಂತ ಇದು. ಎಂಟ್ರೆನ್ಸ್ ಪರೀಕ್ಷೆಯಲ್ಲಿ ತೇರ್ಗಡೆ ಹೊಂದಿದ ಶಿವಣ್ಣ, ಬೆಂಗಳೂರಿನ ಸೆಂಟ್ರಲ್ ಕಾಲೇಜಿಗೆ ಸೇರಿಕೊಳ್ಳಲು ಉದ್ದಾನ ಶ್ರೀಗಳ ಅಪ್ಪಣೆ ಕೇಳಿದರು. ಸ್ವಾಮಿಗಳು, ಚೆನ್ನಾಗಿ ಓದುವಂತೆ ಹಾಗೂ ಆಗಾಗ ಮಠಕ್ಕೆ ಬಂದು ಹೋಗುತ್ತಿರುವಂತೆ ತಿಳಿಸಿ ಆಶೀರ್ವದಿಸಿದರು.
ಮರುಳಾರಾಧ್ಯರಿಗೆ ಮತ್ತು ಕಾಳಪ್ಪನವರಿಗೆ ಶಿವಣ್ಣ ಬೆಂಗಳೂರಿಗೆ ಹೋಗುತ್ತಿರುವುದರಿಂದ ದೂರ ಇರಬೇಕಲ್ಲ ಎಂದು ಸಂಕಟವಾಯಿತು. ಬೆಂಗಳೂರಿನಲ್ಲಿ ತೋಟದಪ್ಪನವರ ವಿದ್ಯಾರ್ಥಿನಿಲಯಕ್ಕೆ ಸೇರಿಕೊಂಡು ಸೆಂಟ್ರಲ್ ಕಾಲೇಜಿನಲ್ಲಿ 1927ನೇ ಇಸವಿಯಿಂದ ವಿದ್ಯಾಭ್ಯಾಸ ಮುಂದುವರಿಸಿದರು.
ದಿನವೂ ನಸುಕಿನಲ್ಲೆದ್ದು ಸ್ನಾನ ಮಾಡಿ ಹೂ ಪತ್ರೆ ತಂದು ಶಿವ ಪೂಜೆಯಲ್ಲಿ ಮುಳುಗುತ್ತಿದ್ದರು. ಪಾಶ್ಚಾತ್ಯ ನಾಗರಿಕತೆಯೆಡೆ ವಾಲದೇ ಆಚಾರ ಸಂಹಿತೆ ಪಾಲಿಸಿಕೊಂಡು, ನಿಷ್ಠೆ ಮೂಡಿಸಿಕೊಂಡು ವಿದ್ಯಾರ್ಥಿನಿಲಯದಲ್ಲಿ ಒಂದು ಧರ್ಮ ನೀತಿ ಸಂಹಿತೆಯನ್ನು ತೆರೆದರು. ಕಟ್ಟು ನಿಟ್ಟಿನ ಅಹಾರ ಪದ್ಧತಿ ರೂಢಿಸಿಕೊಂಡಿರುವುದನ್ನು ನೋಡಿ ಹಲವು ಮಿತ್ರರು `ಶೀಘ್ರದಲ್ಲಿ ಯಾವುದಾದರೊಂದು ಮಠದ ಸ್ವಾಮಿಗಳಾಗುವುದು ಉತ್ತಮ’ ಎಂದು ಹಾಸ್ಯ ಮಾಡುತ್ತಿದ್ದರಂತೆ. ವಿಶ್ರಾಂತಿ ಸಮಯದಲ್ಲಿ ಸಿದ್ಧಗಂಗಾ ಕ್ಷೇತ್ರ ಮತ್ತು ಉದ್ದಾನ ಶ್ರೀಗಳ ಸಂಬಂಧಿ ಪುಸ್ತಕಗಳನ್ನೇ ಹೆಚ್ಚಾಗಿ ಓದುತ್ತಿದ್ದರಂತೆ.
ರಜಾ ದಿನಗಳಲ್ಲಿ ಸಿದ್ಧಗಂಗೆಯಲ್ಲಿ: ಬೆಂಗಳೂರಿನಲ್ಲಿ ವಿದ್ಯಾರ್ಥಿ ಜೀವನ ಕಳೆಯುತ್ತಿದ್ದರೂ ರಜಾ ದಿನಗಳನ್ನು ಸಿದ್ಧಗಂಗಾ ಕ್ಷೇತ್ರದಲ್ಲಿ ಕಳೆಯುವುದೇ ಅಧಿಕವಾಯಿತು. ಹುಟ್ಟೂರಾದ ವೀರಾಪುರಕ್ಕೆ ಆಗಾಗ ಹೋಗಿ ನಾಲ್ಕಾರು ದಿನಗಳಿದ್ದು ಪುನಃ ಸಿದ್ಧಗಂಗೆಗೆ ಬರುತ್ತಿದ್ದರು. ಸದಾ ಮರುಳಾರಾಧ್ಯರ ಸ್ನೇಹದಲ್ಲಿಯೇ ಇರುತ್ತಿದ್ದ ಇವರು ಆಗಾಗ ಉದ್ದಾನ ಶಿವಯೋಗಿಗಳ ದೃಷ್ಟಿಗೆ ಬಿದ್ದು ಪರೀಕ್ಷೆಗೊಳಗಾಗುತ್ತಿದ್ದರು.
ಮರುಳಾರಾಧ್ಯರಿಲ್ಲದ ಸಮಯವೆಂದರೆ ವಿದ್ಯಾರ್ಥಿಗಳಿಗೆ ಆಲಸ್ಯದ ದಿನ. ಇದನ್ನರಿತ ಶಿವಣ್ಣನವರು ಮರುಳಾರಾದ್ಯರ ಕಪಿನಿಯನ್ನು ತೊಟ್ಟು ಪಾವುಡವನ್ನು ತಲೆಗೆ ಸುತ್ತಿ, ಆವುಗೆಗಳನ್ನು ಮೆಟ್ಟಿ ಸಪ್ಪಳ ಮಾಡುತ್ತ ಅವರಂತೆ ಗುಡುಡುತ್ತ, ವಿದ್ಯಾರ್ಥಿಗಳ ಕೊಠಡಿ ಪ್ರವೇಶ ಮಾಡುತ್ತಿದ್ದಂತೆ. ಮರುಳಾರಾದ್ಯರು ಇಲ್ಲವೆಂದು ಮೈ ಮರೆತು ಮಲಗಿದ್ದ ವಿದ್ಯಾರ್ಥಿಗಳ ಜಂಘಾ ಬಲವೇ ಉಡುಗಿ ಗಡಗಡ ನಡುಗಿ ಮೇಲೆದ್ದು ಅಡ್ಡ ಬಿದ್ದು ಮುಖ ನೋಡಿ ಆಮೇಲೆ ಬಿದ್ದು ಬಿದ್ದು ನಗುತ್ತಿದ್ದರಂತೆ. ಹೀಗೆ ರಜಾ ಕಾಲವನ್ನು ಪೂರೈಸಿ ಯಥಾಪ್ರಕಾರ ಶಿವಣ್ಣನವರು ಬೆಂಗಳೂರಿಗೆ ಬಂದು ಪುನಃ ತಮ್ಮ ವಿದ್ಯಾಭ್ಯಾಸ ಜೀವನದಲ್ಲಿ ತಲ್ಲೀನರಾಗಿರುತ್ತಿದ್ದರು. ಸೆಂಟ್ರಲ್ ಕಾಲೇಜಿನಲ್ಲಿ ಭೌತಶಾಸ್ತ್ರ ಮತ್ತು ಗಣಿತಗಳನ್ನು ಐಚ್ಛಿಕ ವಿಷಯಗಳನ್ನಾಗಿ ಸ್ವೀಕರಿಸಿ, ಎರಡುವರ್ಷ ಮುಗಿಸಿ ಮೂರನೆ ವರ್ಷದಲ್ಲಿ ಮುಕ್ಕಾಲು ಭಾಗ ಕಳೆದಿತ್ತು. ಅಂತಿಮ ಪರೀಕ್ಷೆಗೆ ಕಾದುಕುಳಿತಿದ್ದರು.
ಉತ್ತರಾಧಿಕಾರಿಗಳು ಲಿಂಗೈಕ್ಯ: 1930 ಜನವರಿ 16 ರಂದು ಬರಸಿಡಿಲಿನಂತೆ ದಾರುಣ ವಾರ್ತೆಯೊಂದು ಬಂದು ಬಡಿಯಿತು. ಶ್ರೀ ಸಿದ್ಧಗಂಗಾ ಕ್ಷೇತ್ರದ ಉತ್ತರಾಧಿಕಾರಿ ಶ್ರೀ ಮರುಳಾರಾಧ್ಯರು ಲಿಂಗೈಕ್ಯರಾದರು ಎಂಬುದೇ ಆ ದಾರುಣ ವಾರ್ತೆಯಾಗಿತ್ತು. ಈ ವಾರ್ತೆ ಶಿವಣ್ಣನವರಿಗೆ ಕರ್ಣ ಕಠೋರವಾಯಿತು. ತತ್‍ಕ್ಷಣ ಶ್ರೀ ಕೇತ್ರಕ್ಕೆ ಧಾವಿಸಿ ಬಂದರು. ದೈವ ಕರೆದುಕೊಂಡು ಬಂದಿತು ಎಂದರೆ ತಪ್ಪಾಗಲಾರದು.
ಶಿವಣ್ಣ,  ಶಿವಕುಮಾರಸ್ವಾಮಿಗಳಾದರು: 1930 ಜನವರಿ 16 ರಂದು ಶ್ರೀ ಮರುಳಾರಾಧ್ಯರ ಮಹಾಯೋಗದ ನಂತರ ಉದ್ದಾನ ಶಿವಯೋಗಿಗಳು ತಮ್ಮ ಮುಂದಿನ ಮಾರ್ಗಕ್ಕಾಗಿ ಬೆಟ್ಟವನ್ನೇರಿ ಅಮ್ಮನವರ ಗವಿಯಲ್ಲಿ ಭಾವ ಸಮಾಧಿಯಲ್ಲಿ ಮುಳುಗಿದರು. ಆಗ ಅವರು ಸುಲಲಿತವಾದ ತಮ್ಮ ಅಂತರ್ಮುಖದ ಕನ್ನಡಿಯಲ್ಲಿ ಓರ್ವ ತೇಜೋ ವಿಶೇಷ ಭಸ್ಮೋದ್ಧೂಳಿತ ಶರೀರದ, ರುದ್ರಾಕ್ಷಿ ಮಾಲಾಲಂಕೃತ ಬಾಲ ಶಿವಯೋಗಿಯನ್ನು ನೋಡಿದರು. ಆ ಬಾಲ ಯೋಗಿಯ ಮುಖ ನೋಡಿದ ಪರಿಚಯವಾಯಿತು. ಸಿದ್ದಲಿಂಗೇಶ್ವರನ ಕಾರುಣ್ಯಕ್ಕೆ ತಲೆ ಬಾಗಿದರು.
ಸಹಸ್ರಾರು ಜನರ ಮುಂದೆ ಲಿಂಗೈಕ್ಯರಾದ ಮುರುಳಾರಾಧ್ಯರ ಸಮಾಧಿ ಪೂಜಾ ಕಾರ್ಯ ಮುಗಿಯುತ್ತಿದ್ದಂತೆ ಶ್ರೀ ಉದ್ದಾನ ಶಿವಯೋಗಿಗಳು ಅಲ್ಲಿಗೆ ಒಮ್ಮಿಂದೊಮ್ಮೆಲೇ ಬಂದರು. ಮುಂದೆ ಮಠದ ಉತ್ತರಾಧಿಕಾರಿ ಯಾರೆಂಬ ಜಿಜ್ಞಾಸೆಯೊಡಮೂಡಿತ್ತು. ಎಲ್ಲರ ಮನಸ್ಸಿನಲ್ಲೂ ಶಿವಣ್ಣನವರೇ ಈ ಕ್ಷೇತ್ರದ ಉತ್ತರಾಧಿಕಾರಕ್ಕೆ ಯೋಗ್ಯ ಎಂಬ ಪಿಸುಗುಟ್ಟುವ ಧ್ವನಿ ಏಳತೊಡಗಿತ್ತು.
ಉದ್ದಾನ ಶ್ರೀಗಳು ಬಂದೊಡನೆ ಸುತ್ತಲೂ ಜನಜಂಗುಳಿ ಉಂಟಾಯಿತು. ಶಿವಣ್ಣನವರೂ ಸ್ವಾಮಿಗಳ ಎದುರೇ ನಿಂತಿದ್ದರು. “ಶಿವಣ್ಣನವರೇ ನೀವು ಈ ಮಠದ ಉತ್ತರಾಧಿಕಾರವನ್ನು ವಹಿಸಿಕೊಂಡು ಸಿದ್ಧಲಿಂಗೇಶ್ವೆರರ ಪ್ರತಿನಿಧಿಗಳಾಗಿ ಈ ದಾಸೋಹ ಕ್ಷೇತ್ರದ ಗುರುತರ ಹೊಣೆಗಾರಿಕೆಯನ್ನು ವಿಶೇಷ ಶಕ್ತಿ ಸಾಮಥ್ರ್ಯದಿಂದ ನಡೆಸಿಕೊಂಡು ಹೋಗಬೇಕೆಂಬುದು ಸಮಸ್ತ ಭಕ್ತರ ಅಭಿಲಾಷೆ, ಸಿದ್ಧಲಿಂಗೇಶ್ವರರ ಆಜ್ಞೆ, ನಮ್ಮ ಇಚ್ಛೆ. ಯಾವುದನ್ನೂ ಯೋಚಿಸದೇ ನಮಸ್ಕಾರ ಹಾಕಿಬಿಡು” ಎಂದು ಶಿವಣ್ಣನವರ ತಲೆ ಮೇಲೆ ಕೈ ಇಟ್ಟು ಹೇಳಿ ಬಿಟ್ಟರು. ಉದ್ದಾನ ಶಿವಯೋಗಿಗಳು ತಲೆ ಮೇಲೆ ಕೈ ಇಟ್ಟೊಡನೆ ಶಿವಣ್ಣನವರು ತಮ್ಮನ್ನು ತಾವು ಮರೆತರು. ನಡುಗಿ ದೃಢಗೊಂಡರು. ಯಾವುದನ್ನೂ ಯೋಚಿಸದೇ ನಮಸ್ಕಾರ ಹಾಕಿ ಬಿಡು ಎಂದ ಮೇಲೆ ಇನ್ನೇನು ಯೋಚಿಸುವುದು ಎಂದುಕೊಂಡು ಉದ್ದಾನೇಶ್ವರರ ಪದತಲದಲ್ಲಿ ತಮ್ಮನ್ನು ಅರ್ಪಿಸಿಕೊಂಡರು. ಶಿವಣ್ಣನವರಲ್ಲಿ ಅದ್ಭುತ ಶಕ್ತಿ ಸಂಚಾರವಾಯಿತು. ಶಿವಣ್ಣನವರು ಒಪ್ಪಿಗೆ ಸೂಚಿಸಿದರು. ಅವರಿತ್ತ ವೀರಶೈವ ವಿರಕ್ತ ಪರಂಪರೆಯ ಕಾಶಾಯ ವಸ್ತ್ರ ಧರಿಸಿ “ಶ್ರೀ ಶಿವಕುಮಾರ ಸ್ವಾಮಿಗಳು” ಎಂಬ ನೂತನ ನಾಮಾಂತರದಿಂದ ಬೆಂಗಳೂರಿಗೆ ತೆರಳಿದರು. ತಮ್ಮ ಪದವಿ ಶಿಕ್ಷಣದ ಕೊನೆಯ ಪರೀಕ್ಷೆಗೆ ಸಿದ್ಧರಾಗತೊಡಗಿದರು.ಉಪಾಧ್ಯಾಯ ವರ್ಗ ಸಂತಸದಿಂದ ಶ್ರೀಗಳೆಂದು ಶ್ಲಾಘಿಸಿತು.
ಜನನದಿಂದ ಅಧಿಕಾರ ಸ್ವೀಕರಿಸಿದವರೆಗಿನ ಹೈಲೈಟ್ಸ್
1908 : ಬೆಂಗಳೂರು ಜಿಲ್ಲೆ ಮಾಗಡಿ ತಾಲೂಕಿನ ವೀರಾಪುರ ಗ್ರಾಮದಲ್ಲಿ ಗಂಗಮ್ಮ ಹೊನ್ನಪ್ಪ ದಂಪತಿಯ ಮಗನಾಗಿ ಜನನ.
1913 : ವೀರಾಪುರ ಮತ್ತು ಪಾಲಹಳ್ಳಿಯಲ್ಲಿ ಪ್ರಾಥಮಿಕ ವಿದ್ಯಾಭ್ಯಾಸ.
1921 : ನಾಗವಲ್ಲಿ (ತರೂರು) ಮಾಧ್ಯಮಿಕ ಶಾಲಾ ವಿದ್ಯಾಭ್ಯಾಸ.
1922 : ತುಮಕೂರಿನ ಸರಕಾರಿ ಪ್ರೌಢಶಾಲೆಯಲ್ಲಿ ವಿದ್ಯಾಭ್ಯಾಸ.
1926 : ಮೆಟ್ರಿಕ್ಯೂಲೇಷನ್ ಪರೀಕ್ಷೆಯಲ್ಲಿ ಉತ್ತೀರ್ಣ.
1927 : ಸಿದ್ಧಗಂಗಾ ಕ್ಷೇತ್ರಾಧಿಪತಿ ಶ್ರೀ ಉದ್ದಾನ ಶಿವಯೋಗಿಗಳ ಆಶ್ರಯದಲ್ಲಿ ನಾಲ್ಕು ತಿಂಗಳ ವಾಸ್ತವ್ಯ, ಎಂಟ್ರೆನ್ಸ್ ಪರೀಕ್ಷೆಯಲ್ಲಿ ಉತ್ತೀರ್ಣತೆ.
1927 ರಿಂದ 1930 : ಬೆಂಗಳೂರಿನ ತೋಟದಪ್ಪ ವಿದ್ಯಾರ್ಥಿ ನಿಲಯದಲ್ಲಿ ಆಶ್ರಯ, ಬೆಂಗಳೂರಿನ ಸೆಂಟ್ರಲ್ ಕಾಲೇಜಿನಲ್ಲಿ ಬಿಎ ಪದವಿ ವಿದ್ಯಾಭ್ಯಾಸ.
1930 : 16-01-1930ರಂದು ಶ್ರೀ ಸಿದ್ಧಗಂಗಾ ಕ್ಷೇತ್ರದ ಉತ್ತರಾಧಿಕಾರಿಗಳಾಗಿದ್ದ ಶ್ರೀ ಮರುಳಾರಾಧ್ಯರ ಸಮಾಧಿಕ್ರಿಯೆಯಲ್ಲಿ ಪಾಲ್ಗೊಂಡು ಶ್ರೀ ಉದ್ದಾನ ಸ್ವಾಮಿಗಳ ಕೃಪಾಕಟಾಕ್ಷಕ್ಕೆ ಪಾತ್ರ. 3-3-1930 ಶ್ರೀ ಸಿದ್ಧಗಂಗಾ ಕ್ಷೇತ್ರದ ಉತ್ತರಾಧಿಕಾರಿಯಾಗಿ ಆಯ್ಕೆ.
1933 : 10-9-1933 ಶ್ರೀ ಶಿವಯೋಗಿ ಮಂದಿರಕ್ಕೆ ಭೇಟಿ
1941 : 11-1-1941 ಶಿವಯೋಗಿ ಶ್ರೀ ಉದ್ದಾನಸ್ವಾಮಿಗಳು ಲಿಂಗೈಕ್ಯ. ಶ್ರೀ ಸಿದ್ಧಗಂಗಾ ಮಠದ ಪೂರ್ಣಾಧಿಕಾರಿಯಾಗಿ ಅಧಿಕಾರ ಸ್ವೀಕಾರ.
**
ಸಿದ್ಧಗಂಗೆಯಲ್ಲಿ ಶ್ರೀಗಳ ತಪಸ್ಸು: ಕಲ್ಯಾಣದ ಕ್ರಾಂತಿಯ ಬಳಿಕ ದಕ್ಷಿಣ ಭಾರತಕ್ಕೆ ವಲಸೆ ಬಂದ ಅನೇಕ ಚರಮೂರ್ತಿಗಳ ಗುಂಪು ಶಿವಗಂಗಾ ಪರಿಸರವನ್ನು ಆಯ್ದುಕೊಂಡಿತು. ಇದರಲ್ಲಿ ಚಿಕ್ಕಸಿದ್ಧೇಶ್ವರರು ಪ್ರಮುಖರಾಗಿದ್ದರು ಎಂದು ಇತಿಹಾಸ ಹೇಳುತ್ತದೆ. ಇದರಿಂದ ಕಲ್ಯಾಣದ ಪರಂಪರೆ ಇಲ್ಲಿ ನೇರವಾಗಿ ಪ್ರಸಾರವಾಗಲು ಸಾಧ್ಯವಾಯಿತು ಎಂಬುದಾಗಿ ತಿಳಿದು ಬರುತ್ತದೆ.
ಬಳಿಕ ಸಿದ್ಧತ್ರಯರಾದ ರೇವಣ ಸಿದ್ಧೇಶ್ವರ, ಮರುಳ ಸಿದ್ಧೇಶ್ವರ, ಸಿದ್ಧರಾಮೇಶ್ವರ ಮತ್ತು ರುದ್ರಮುನಿ ಶಿವಾಚಾರ್ಯರು ಈ ಭಾಗಗಳಲ್ಲಿ ಈ ಭಾಗಗಳಲ್ಲಿ ಸಂಚರಿಸಿ, ನೆಲೆಯೂರಿದರು. ಮುಂದೆ ಹರದನಹಳ್ಳಿ ಪೀಠಾಚಾರ್ಯರಲ್ಲಿ ಗೋಸಲಸಿದ್ಧೇಶ್ವರರು ಮೊದಲ್ಗೊಂಡು ಕಟ್ಟಿಗೆಹಳ್ಳಿ ಸಿದ್ಧಲಿಂಗೇಶ್ವರರ ವರೆಗೆ ಅನೇಕ ಶರಣರಿಂದ ಈ ಶಿವಗಂಗಾ ಪರಿಸರಕ್ಕೆ ಕಳೆ ಏರಿತು. ಇವರೆಲ್ಲರ ಕ್ರಾಂತಿಯಿಂದ ಶಿವಗಂಗೆ ಸುತ್ತಮುತ್ತಲ ಪ್ರದೇಶದಲ್ಲಿ ಅನೇಕ ಮಠ ಮಾನ್ಯಗಳು, ಪರಂಪರೆಗಳು ಬೆಳೆದು ಬಂದವು. ಅನೇಕ ವೀರಶೈವ ಧರ್ಮ ಪ್ರತಿನಿಧಿಸುವ ದೇವಾಲಯಗಳು ಅಸ್ತಿತ್ವಕ್ಕೆ ಬಂದವು. ವೀರಶೈವ ಧರ್ಮ ತತ್ವ, ಸಂಸ್ಕತಿಯನ್ನು ಪ್ರತಿಪಾದಿಸುವ ಗ್ರಂಥ ರಾಶಿಗಳು ಹೊರಹೊಮ್ಮಿದವು. ಇವಕ್ಕೆಲ್ಲ ಶಿವಗಂಗೆ, ಸಿದ್ಧಗಂಗೆ, ಗುಳೂರು, ಗುಬ್ಬಿ, ಗುಮ್ಮಳಾಪುರ, ಎಡೆಯೂರು ಮತ್ತಿತರ ಸ್ಥಳಗಳು ಕೇಂದ್ರಗಳಾದವು. ಅಂಥ ಕ್ಷೇತ್ರಗಳಲ್ಲಿ ಶ್ರೀ ಸಿದ್ಧಗಂಗಾ ಕ್ಷೇತ್ರವೂ ಒಂದು.
ಇಂಥ ಕ್ಷೇತ್ರಗಳ ಶರಣರ ಮಾಲಿಕೆಯಲ್ಲಿ ತಮ್ಮ ಕರ್ತೃತ್ವ ಶಕ್ತಿಯಿಂದ ಪ್ರಚಂಡ ಕ್ರಾಂತಿಯನ್ನುಂಟು ಮಾಡಿದವರ ಪೈಕಿ ತ್ರಿವಿಧ ದಾಸೋಹಿ ಶಿವಕುಮಾರ ಸ್ವಾಮೀಜಿಯವರು ಒಬ್ಬರು. ಬಸವಣ್ಣನವರು ಸಾಮಾಜಿಕ ಕ್ರಾಂತಿಯನ್ನೇ ಮಾಡಿದರು. ಜಾತಿಬೇಧ ತೊಲಗಿಸಲು ಅವಿತರ ಹೋರಾಡಿದರು. ಶಿವಯೋಗಿ ಸಿದ್ಧರಾಮರು ಕೆರೆ ಕಟ್ಟೆಗಳನ್ನು ಕಟ್ಟಿಸಿ ರೈತರು, ಜನ ಸಾಮಾನ್ಯರು ಜೀವ ಜಲ ಕಾಪಾಡಿಕೊಳ್ಳಬೇಕಾದ ಮಹತ್ವವನ್ನು ಸಾರಿದರು. ಇವೆಲ್ಲದರೊಂದಗೆ 20ನೇ ಶತಮಾನದಲ್ಲಿ ಅತ್ಯಗತ್ಯವಾದ ತ್ರಿವಿಧ ದಾಸೋಹವನ್ನು ಸಾಕಾರಗೊಳಿಸಿ ತಮ್ಮ ಅಖಂಡ 102 ವರ್ಷಗಳನ್ನು ಪೂರೈಸಿ 103ನೇ ವರ್ಷದಲ್ಲಿದ್ದಾರೆ ಶಿವಕುಮಾರ ಸ್ವಾಮೀಜಿಗಳು.
ಹಸಿದವರಿಗೆ ಅನ್ನ, ಸರ್ವರಿಗೂ ಜ್ಞಾನ ಮತ್ತು ಆಧ್ಯಾತ್ಮ ಭಕ್ತಿ ಎಲ್ಲರಲ್ಲಿ ನೆಲೆಗೊಳ್ಳಬೇಕು ಎಂಬ ಅವರ ಸಂಕಲ್ಪದತ್ತ ಆರಂಭದಿಂದಲೂ ಸ್ಪಷ್ಟ ಹೆಜ್ಜೆ ಹಾಕಿದರು. ಶ್ರೀಗಳು ಚಿಕ್ಕದಾಗಿ ಆರಂಭಗೊಂಡ ದಾಸೋಹನ್ನು ನಿತ್ಯ ಸಹಸ್ರಾರು ಜನರಿಗೆ ತಲುಪುವಂತೆ ಬೃಹದಾಕಾರವಾಗಿ ಬೆಳೆಸಿದರು. ನೂರಾರು ಶಿಕ್ಷಣ ಸಂಸ್ಥೆಗಳನ್ನು ತೆರೆದು ಮುನ್ನಡೆಸಿದರು. ಕಾಯಕ ಸಿದ್ಧಾಂತವನ್ನು ಮನೆ ಮನೆಗೆ ತಲುಪಿಸಲು ಕೃಷಿಗೆ ಪ್ರೋತ್ಸಾಹ ನೀಡಲು ನಾನಾ ಕಾರ್ಯಕ್ರಮ ಹಮ್ಮಿಕೊಂಡರು. ಆಧ್ಯಾತ್ಮಿಕ ವಿಚಾರ ಧಾರೆಗಳನ್ನು ಪ್ರಚುರಪಡಿಸಿದರು. ಇವರದ್ದು ಒಂದು ತಪಸ್ಸೇ ಸರಿ.
ಸಿದ್ಧಗಂಗಾ ಮಠ ಸ್ಥಾಪನೆ; ಸುಮಾರು 600 ವರ್ಷಗಳ ಹಿಂದೆ ಮೂಲತಃ ಹರದನಹಳ್ಳಿ ಶೂನ್ಯಸಿಂಹಾಸನ ಜಗದ್ಗುರು ಗೋಸಲಸಿದ್ದೇಶ್ವರಿಂದ ಸಿದ್ಧಗಂಗಾ ಮಠ ಸ್ಥಾಪಿತವಾಯಿತು. ಶ್ರೀಮಠದಲ್ಲಿ ಅಟವೀ ಸ್ವಾಮೀಜಿ ಅವರಿಂದ ಅನ್ನ ಮತ್ತು ಜ್ಞಾನ ದಾಸೋಹ ಸೇವೆ 19 ನೇ ಶತಮಾನದ ಉತ್ತರಾರ್ಧದಲ್ಲಿ ಆರಂಭವಾಗಿ ಇಂದಿಗೂ ನಿರಂತರವಾಗಿ ಸಾಗಿದೆ.
ಅಟವೀ ಸ್ವಾಮೀಜಿ ನಂತರ ಉದ್ದಾನ ಶಿವಯೋಗಿ 1917 ರಲ್ಲಿ ಅಧಿಕೃತವಾಗಿ ವೇದ ಮತ್ತು ಸಂಸ್ಕೃತ ಪಾಠ ಶಾಲೆ ಹಾಗೂ ಸಾರ್ವಜನಿಕ ವಿದ್ಯಾರ್ಥಿ ನಿಲಯ ಸ್ಥಾಪಿತವಾಗಿತ್ತು. ಮತ ಬೇದವಿಲ್ಲದೆ ಉಚಿತ ಊಟ ವಸತಿಯನ್ನು ವ್ಯವಸ್ಥೆ ಮಾಡಿದ ಮತ್ತು ಎಲ್ಲ ಜನಾಂಗದವರು ಸಂಸ್ಕೃತ ಅಭ್ಯಾಸ ಮಾಡಲು ಅವರು ನೆಟ್ಟ ಸಸಿಯಾದ ಉಚಿತ ಶಿಕ್ಷಣ ಮತ್ತು ಉಚಿತ ವಿದ್ಯಾರ್ಥಿನಿಲಯ ಭಿಕ್ಷಾಟನೆ ಮತ್ತು ದಾನಿಗಳ ದೇಣಿಗೆಗಳಿಂದ ಹೆಮ್ಮರವಾಗಿ ಬೆಳೆಯುತ್ತಿದೆ.
ಉದ್ದಾನ ಶಿವಯೋಗಿಗಳು 1941 ರಲ್ಲಿ ಲಿಂಗೈಕ್ಯರಾದ ಬಳಿಕ 1930 ರಲ್ಲಿ ಮಠದ ಕಿರಿಯ ಶ್ರೀಗಳಾದ ಡಾ.ಶ್ರೀ ಶಿವಕುಮಾರಸ್ವಾಮೀಜಿಯವರ ನಿರಂತರ ದುಡಿಮೆ, ಸಾಧನೆಗಳಿಂದ ಅವರ ಅಧಿಕಾರ ಪೂರ್ವದಲ್ಲಿದ್ದ ಒಂದೇ ಒಂದು ಶಿಕ್ಷಣ ಸಂಸ್ಥೆ ಇಂದು 130ಕ್ಕೂ ಅಧಿಕ ಶಾಲಾ, ಕಾಲೇಜುಗಳಾಗಿ ಬೆಳೆಯಿತು.
ಕಿರಿಯ ಶ್ರೀಗಳಾದ ಸಿದ್ಧಲಿಂಗಸ್ವಾಮೀಜಿ ಕ್ಷೇತ್ರದ ಮುಂಬೆಳಕಾಗಿ ಹಿರಿಯ ಶ್ರೀಗಳ ಆಶೋತ್ತರಗಳಿಗೆ ಸ್ಪಂದಿಸುತ್ತಾ ಕಾರ್ಯಚಟುವಟಿಕೆಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡರು. 2019ರ ಜನವರಿ 21ರಂದು ಸಿದ್ಧಗಂಗಾ ಮಠದ ಹಿರಿಯ ಶ್ರೀ ಡಾ.ಶಿವಕುಮಾರ ಸ್ವಾಮಿಗಳು ಕೋಟ್ಯಾಂತರ ಭಕ್ತರನ್ನು ದೈಹಿಕವಾಗಿ ಅಗಲಿ, ಶಿವನಲ್ಲಿ ಲೀನರಾದರು.
ಜಾತಿ, ಮತ, ಧರ್ಮ, ಭೇದವಿಲ್ಲದೇ ಈಗ ಸುಮಾರು 10 ಸಾವಿರ ವಿದ್ಯಾರ್ಥಿಗಳು ಸಿದ್ಧಗಂಗಾ ಮಠದ ಉಚಿತ ವಿದ್ಯಾರ್ಥಿನಿಲಯದಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಅಲ್ಲದೆ ನಿತ್ಯ ಸಾವಿರಾರು ಯಾತ್ರಾರ್ಥಿಗಳಿಗೆ ಉಚಿತ ದಾಸೋಹ(ಪ್ರಸಾದ)ದ ವ್ಯವಸ್ಥೆಯೂ ಇದೆ.
ಮಠವನ್ನಾಳಿದ ಶ್ರೀಗಳು:
14ನೇ ಶತಮಾನದಿಂದೀಚೆಗೆ ಮುಖ್ಯರಾದವರೆಂದರೆ
ಶ್ರೀ ನಂಜುಂಡಸ್ವಾಮೀಜಿ(1784-1820)
ಶ್ರೀ ರುದ್ರಸ್ವಾಮೀಜಿ(1820-1853)
ಶ್ರೀ ಸಿದ್ಧಲಿಂಗಸ್ವಾಮೀಜಿ(1853-1901)
ಶ್ರೀ ಉದ್ದನ ಸ್ವಾಮೀಜಿ(1901-1941)
ಶ್ರೀ ಮರುಳಾರಾಧ್ಯ ಸ್ವಾಮೀಜಿ(1924-1930)
ಶ್ರೀ ಶಿವಕುಮಾರ ಸ್ವಾಮೀಜಿ(11.1.1941 -21-1-2021 )
ಶ್ರೀ ಸಿದ್ದಲಿಂಗ ಸ್ವಾಮೀಜಿ (ದೀಕ್ಷೆ -1988…..)
ಶ್ರೀಗಳಿಗೆ ಸಂದ ಪುರಸ್ಕಾರ
1) ಕರ್ನಾಟಕ ವಿಶ್ವವಿದ್ಯಾಲಯದ ಗೌರವ ಡಿ.ಲಿಟ್ ಪದವಿ (6-11-1965)
2)ವಿಧಾನ ಸೌಧದೆದುರು ನಡೆದ ಸಮಾರಂಭದಲ್ಲಿ ಕರ್ನಾಟಕ ಸರಕಾರ ನೀಡಿದ `ಕರ್ನಾಟಕ ರತ್ನ’ ಪ್ರಶಸ್ತಿ 1-4-2007
3)ಕರ್ನಾಟಕ ಸರಕಾರ ನೀಡಿದ 2007ರ ರಾಷ್ಟ್ರೀಯ `ಬಸವ ಪುರಸ್ಕಾರ’ ಪ್ರಶಸ್ತಿ.(1-4-2010)
4)ತುಮಕೂರು ವಿಶ್ವವಿದ್ಯಾಲಯದ ಗೌರವ ಡಾಕ್ಟರೇಟ್ ಪದವಿ. (ಮಠಕ್ಕೇ ಕೊಂಡೊಯ್ದು ವಿವಿ ಕುಲಪತಿ ಕೊಟ್ಟರಾದರೂ ಶ್ರೀಗಳು ಸ್ವೀಕರಿಸಲಿಲ್ಲ)
ಭಕ್ತರು ನೀಡಿದ ಬಿರುದು
1)ನಡೆದಾಡುವ ದೇವರು
2)ತ್ರಿವಿಧ ದಾಸೋಹಿ
3)ಕಾಯಕ ಯೋಗಿ
4)ಅಭಿನವ ಬಸವಣ್ಣ
5)ಶಕ ಪುರುಷ
6)ಶತಮಾನದ ಸಂತ
 ಶತಮಾನ ಬದುಕಿದ ಶ್ರೀಗಳಿಗೆ ಭಕ್ತರ ವಂದನೆಯೂ, ಭಕ್ತರ ಅಭಿಮಾನ, ಭಕ್ತ ಸಮೂಹ ಸಣ್ಣದಲ್ಲ. ಕಾಲ ಕಾಲಕ್ಕೆ, ಶ್ರೀಗಳ ಜೀವನದ ಪ್ರತಿ ಘಟ್ಟದಲ್ಲೂ ಭಕ್ತ ಸಮೂಹ ಭಾರೀ ಸಂಖ್ಯೆಯಲ್ಲಿ ಸೇರಿ ಗುರುವಂದನೆ ಸಲ್ಲಿಸಿದೆ. ಅನೇಕ ಬಾರಿ ಶ್ರೀಗಳ ಜನ್ಮ ದಿನಾಚರಣೆಯನ್ನೂ ಅತ್ಯಂತ ಅರ್ಥಪೂರ್ಣವಾಗಿ ಆಚರಿಸಿದ್ದಾರೆ ಭಕ್ತರು. ಅಂಥ ಮಹತ್ವದ ಘಟ್ಟಗಳು ಇಲ್ಲಿವೆ.
ಮಠದಲ್ಲಿ ನಡೆದ ಮಹತ್ವದ ಮಹೋತ್ಸವಗಳು
1) ಶಿವಕುಮಾರ ಸ್ವಾಮೀಜಿ ಪೀಠಾಧಿಕಾರ ಸ್ವೀಕರಿಸಿದ ರಜತ ಮಹೋತ್ಸವ 26-5-1972
2)ಶಿವಕುಮಾರ ಸ್ವಾಮೀಜಿ ವಿರಕ್ತಾಶ್ರಮ ಸ್ವೀಕರಿಸಿದ ವಜ್ರ ಮಹೋತ್ಸವ 1997ರ ಮಾರ್ಚ್ 22ರಿಂದ24
3) ಶ್ರೀಗಳ 98ನೇ ಜನ್ಮ ದಿನೋತ್ಸವ 24-4-2005
4) ಶ್ರೀಗಳ ಅಮೃತ ಮಹೋತ್ಸವ 25-4-2005
5) ಶಿವಕುಮಾರ ಸ್ವಾಮೀಜಿ 99ನೇ ಜನ್ಮ ದಿನಾಚರಣೆ, ಗುರುವಂದನೆ. ರಾಷ್ಟ್ರಪತಿ ಡಾ.ಎ.ಪಿ.ಜೆ. ಅಬ್ದುಲ್ ಕಲಾಂರಿಂದ ಉದ್ಘಾಟನೆ. 7-4-2006
6) ಶ್ರೀಗಳ 100ನೇ ಜನ್ಮ ದಿನೋತ್ಸವ ಅಚರಣೆ, ರಾಷ್ಟ್ರಪತಿ ಕಲಾಂರಿಂದ ಉದ್ಘಾಟನೆ-2007
7) ಶ್ರೀಗಳ 101ನೇ ಜನ್ಮ ದಿನೋತ್ಸವ ಅಚರಣೆ, ಮಾಜಿ ರಾಷ್ಟ್ರಪತಿ ಕಲಾಂರಿಂದ ಉದ್ಘಾಟನೆ -2008
8) ಶ್ರೀಗಳ ಬೃಹತ್ ಶತಮಾನೋತ್ಸವ ಹಾಗೂ ಗುರುವಂದನೆ – 2009. ರಾಷ್ಟ್ರಪತಿ ಪ್ರತಿಭಾ ಪಾಟೀಲ್‍ರಿಂದ ಉದ್ಘಾಟನೆ.
9) ಶ್ರೀಗಳ 110ನೇ ಜನ್ಮ ದಿನಾಚರಣೆ, ಗುರುವಂದನೆ, ಏಪ್ರಿಲ್ 1,2017
10)ಶ್ರೀಗಳಿಗೆ ರಾಜ್ಯ ಸರಕಾರದಿಂದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಿಂದ ಸ್ಥಾಪಿಸಲಾದ ಮಹಾವೀರ ಶಾಂತಿ ಪ್ರಶಸ್ತಿ ಮುಖ್ಯಮಂತ್ರಿ ಸಿದ್ದರಾಮಯ್ಯರಿಂದ ವಿತರಣೆ -2017
ಚಿತ್ರಗಳು; ತೊರೆಮಾವಿನಹಳ್ಳಿ ಸುರೇಶ್(ಟಿ.ಎಚ್.ಸುರೇಶ್)
ತುಮಕೂರುನ್ಯೂಸ್.ಇನ್ ವಾಟ್ಸ್ ಆಪ್ ನಂಬರ್ :+91 9148215339 ಇಮೇಲ್: tumkurnews.in@gmail.com ವೆಬ್ ಸೈಟ್ : https://www.tumkurnews.in/

Leave a Reply

Your email address will not be published. Required fields are marked *

error: Content is protected !!